Ons skool is eers by Millsstraat 96 gehuisves totdat die huidige skoolgebou voltooi is. Die opening het op 22 Januarie 1962 plaasgevind met 97 st. 6-leerders onder die naam Hoërskool Valsbaai.
Op 23 Julie 1963 is die skool amptelik in die nuwe gebou onder die naam Hoërskool Strand geopen.
Die eerste skoolhoof was mnr. MJ Odendaal.
Die skoolwapen is deur dr. C Pama, erkende heraldikus, ontwerp en op 23 November 1963 in ontvangs geneem.
Die heraldiek daarvan is soos volg:
Die Arend is ’n simbool van krag, die blou en silwer strepe verteenwoordig die see en die kasteel is afkomstig van die familiewapen van die Van der Stel-familie.
Die leuse is: Volhard en Oorwin.